上文提到，我哋人體嘅脂肪，係透過直接攝取脂肪同埋攝取過量碳水轉化而成，兩大途徑。
如果我哋要令肥肉消失，個過程亦有分兩個階段：分解同氧化。但好多人會混淆，以為係同一件事，於是成為左好多商家誤導消費者嘅陷阱。好多聲稱可以提升「脂肪分解」嘅產品都係智商稅。儲存喺身體入面嘅脂肪，全名叫做「三酸甘油酯」。結構係由一個甘油，串連三個脂肪酸組成。而我哋嘅脂肪細胞係一個容器，負責裝住呢啲三酸甘油脂。
呢度要提一提抽脂手術，抽脂手術可以立即減少脂肪細胞嘅數目，但脂肪細胞嘅大細係可以改變，理論上可以無上限變大。假設你嘅脂肪攝取量不變，就算脂肪細胞數量減少，每一粒脂肪細胞裝嘅脂肪酸就會增加，總脂肪細胞嘅體積會慢慢去返手術之前。
三酸甘油酯要經過「水解」，先可以分拆成三個脂肪酸同一個甘油。（所以點解減肥要飲多啲水）
將脂肪酸從脂肪細胞入面拉出嚟，呢個過程就係「脂肪的分解」。但注意，唔代表脂肪呢一刻從我哋身體入面消失咗。
呢三個脂肪酸會喺血液入面遊蕩，等待機會「被使用」。當我哋做運動嘅時候，能量需求上升，身體就會將血液入面嘅游離脂肪酸，透過左旋肉鹼（搬運工人）拉入線粒體（熔爐）入面燃燒，燒完之後，最後會變咗二氧化碳，透過呼吸排出體外。
喺呢個時候脂肪先係真正咁消失，呢個過程叫做「脂肪氧化」。
喺度順帶一提，有啲左旋肉鹼補充品號稱可以幫助消脂，要注意嘅係，一般人缺嘅唔係左旋肉鹼，而係作為熔爐嘅線粒體。當你冇多餘嘅「爐」嘅時候，你有幾多搬運工人都冇用。
我哋可以透過有氧運動，提升線粒體嘅數目，但提升唔到左旋肉鹼嘅數量。由此可見，只有大量運動嘅人先有需要補充左旋肉鹼，前提係你要有足夠線粒體。
沒有留言:
發佈留言