首先我哋講講碳水化合物嘅基本構成，分三類：
單醣：葡萄糖、果糖、半乳糖
雙醣：由兩個單醣結合，例如半乳糖加葡萄糖等於乳糖、葡萄糖加果糖等於砂糖
多醣：由大量醣分子結合而成，例如成千上萬個葡萄糖結合會變咗「澱粉質」
好似砌Lego咁，唔同單醣互相結合，會變咗唔同雙醣，再結合會變咗多醣。記住，越複雜嘅結構，人體消化得越慢，越簡單消化速度就越快，呢個concept去到之後好重要。
以上係化學嘅角度，唔多講。從食物嘅角度，好多嘢都係碳水，好多人以為碳水等於澱粉質，其實澱粉質只不過係碳水其中一種。
我哋可以從兩個角度，熱量同飽肚感，去睇減肥應該食邊類型嘅碳水？
高熱量高飽肚感：澱粉質
高熱量低飽肚感：添加糖
低熱量高飽肚感：膳食纖維
低熱量低飽肚感：糖醇（代糖）
答案呼之欲出。最應該食嘅係「低熱量高飽肚感」，最唔應該食嘅係「高熱量低飽肚感」。
排名第一係膳食纖維，簡單啲講，就係各式各樣嘅菜。佢屬於多醣，結構上好難消化，消化唔到嘅殘餘物落到小腸係好好嘅益生元（益生菌嘅食物）。熱量每一克只有兩大卡，係普通碳水嘅一半。有強烈嘅飽肚感，同較低熱量。
排名第二係澱粉質，都係一種多醣，由大量葡萄糖組成，可以快速為人體提供能量。熱量係每克四大卡。佢唔可以直接幫助減肥，但冇佢人體會出現好多問題，所以進食嘅份量同時十分重要，呢個我哋下個章節再講。
排名第三係代糖，熱量好低，人工代糖嘅熱量直程可以忽略不計（因為用量極少），可以視為「添加糖」嘅替代品，滿足大腦對甜味嘅需求。
最唔應該食，就係添加糖，高熱量，低飽肚感，消化極快，會引起血糖波動，刺激食慾。
沒有留言:
發佈留言