《弱肉強食嘅世界，總有人會被淘汰》

李嘉誠唔識起樓，但佢識得搵適當嘅人才幫佢起樓。常言道：「識人好過識字。」咁究竟一個人，要具備甚麼能力，先至會畀人賞識呢？要解答呢個問題，日常嘅觀察畀到我一啲啟發。

我成日喺到諗：無論係茶餐廳、西餐，抑或是千蚊一個頭嘅餐廳，唔計大廚，二廚乃至其他廚師的人工都只係萬零蚊至兩零蚊。明明，佢哋先係煮嘢食嗰個，點解袋嘅人工反而係咁少？煮嘢食的技巧需要慢慢浸出嚟，唔係阿豬阿狗都識煮。但出邊樓面啲經理淨係用把口，人工反而仲高？

中醫師斷完症之後，寫配方，出邊啲配藥員負責執藥。實質畀藥你嗰個配藥員人工都係萬零蚊。明明，佢哋先係負責執藥嗰個，點解袋嘅人工又差咁遠？雖則執藥員要掌握的技巧冇一個廚師咁多，但都總算係一份專業。

想通以後，原來，呢個就係Offer「Solution」同埋「Product」嘅分別。

一個廚師、一個執藥員、一個Working Level的同事，大部分時間只需要埋頭苦幹、「不理世事」，做好自己的本份就可以了。換句話說 Product，係屬於Working Level員工負責處理的東西。

另一方面，Working Level員工對上的管理層「享有」工作的Accountability，係需要被問責嘅。一個管理層，要識得從林林總總嘅Product裡面，選擇合適公司的做法，考驗嘅係管理層的組織能力、概念能力，同埋商業頭腦Business Acumen。

每樣工作都有Cost，做唔做到只係一個好基本的切入點，最重要嘅係諗「值唔值得做」。

作為一個管理層，要成個Whole Picture咁去諗點樣執行一啲Corporate Action，計算過公司人手、資源、能力等等因素，從而計算出對於現時情況下最佳的方案Best Solution。而一個Solution呢，係包含多種Product的。

如果，一個管理層，已經要成日同Internal同事開會「修橋補路」、同External Party聯誼為公司「搭通天地線」擴展人脈網絡的情況下，都仲要下下自己落手落腳做嘅話，任你有三頭六臂，唔識管人就自己做到死。

雖則，高層唔需要自己落手落腳「整Product」，但對於每件Product的性質及功用要有一定認識，作為一個管理層，相比技術能力，要求更側重於概念能力。

《關於學習》

今日講下學嘢。

十年磨一劍，要精通一樣技能，達致鶴立雞群嘅程度，冇10年都要8年時間。先唔好講時間有冇限先，但人嘅精力真係有限。

踏入而立之年中段，而家個人個腦轉數係快好多，但同時間，個人一攰就好快Down機。好多時，我寫完一篇3、4000字啲文，我都要休息番一頭半個鐘。可能睇篇文用幾分鐘就睇完，但我快極都要2個幾鐘（已經叫快，以前我起碼要寫2日）先寫得完一篇。

其實，諗標題都好花時間，我都已經懶咗冇特別花時間寫啲「內容農場」呃金Click Rate的標題。我個Friend話我寫得太多字，人哋啲Post好多圖，建議我整多啲，咁如果我又要整埋圖，應該又再用多一個鐘頭時間。咁我成日唔洗做其他嘢。

有位老前輩都有同我分享過。佢諗嘢依然都係可以好快，但同時間亦會好快唔記得嘢。所以，佢一諗到嘢要好快寫低。而佢個人都好快攰。

所以，呢個世界，大把嘢學，要揀嚟學，一個人可以學到嘅知識有限，要「斷捨離」。同時間，正正因為冇咁多時間學咁多嘢，將一門知識「觸類旁通」變得何其重要。由只識一樣嘢的「專才」，化為精通多個範疇（當然首先要建立一門專業）的「全才」（就算唔識都好快學得識，去唔到專業都起碼去到半專業的程度）。

咩行業都好，都有自己嘅專業知識。要學一樣嘢，除咗可以揀老行尊之外，同時應該搵番一啲真心熱愛嗰個範疇嘅人。普遍老行尊好多因為「太叻」，而忘記咗由「無知」轉化為「已知」之間嘅過程。

呢個世界好多叻人都係「識做唔識教」，叫佢教人，佢寧願自己做埋。教書，除咗要知識，同時最重要嘅係「同理心」，知道唔同背景嘅學生會遇到乜嘢學習困難，再用唔同生活例子引起學生嘅共鳴。

學李小龍咁講：「我不怕會一萬種招式的人，我怕把一種招式練一萬遍的對手。」

「將一種武學練了一輩子，練到了極致，每天都不停的練習，這樣的人是非常可怕，意志力非常的堅強，破綻非常少。」

學一樣嘢嚟講，如果有人寫書，睇書可以學識。但係，淨睇書冇人教，學的速度冇咁快，效率冇咁高，亦未必去到教書嗰個人嘅思維深度。兩管齊下，先預習，後聽書，再複習就最有效率。

一個稱職的教書人，除咗賣知識以外，最重要係販賣佢「睇嘢嘅角度」、「解難嘅角度」，即「how to approach a problem」

做過Com Sec，你就會知道，資訊本身，就係權力嘅象徵。上市公司管理層玩Insider Dealing不合法賺錢，就係靠住與小股東之間的資訊不對稱。

所以，資訊本身，唔應該係「免費」的。人哋時間唔係時間，而你嘅時間先係時間？

就好似一隻牛咁，會反芻啲「食物」，盡量喺有限的資源提取更多的養份。

有時諗得太多唔係好事，變「諗樣」，缺乏行動。所以，寫嘢「講下經」都係一種將思緒化為行動啲一種方式。教人，其實同時間自己學緊嘢。唔好抱住教人就蝕底呢個心態收埋收埋，老老實實，一個人識得幾多嘢呢？

所以，除咗Information/ Notes/ Knowledge，最重要嘅，我係賣自己嘅個人觀點，思考角度。呢樣嘢先至係一個人最大價值嘅地方。

《學會不逞強》

所謂的「讓自己越來越好」，並不是不顧一切地衝刺，不是非要像苦行僧般讓自己承受痛苦，反而是在遇到瓶頸或面臨極限時懂得放慢腳步。

生活就像是一條線，我們該讓它保持著彈性，不該一直處於繃緊的狀態，這樣很容易就斷掉。

讓自己越來越好，就要學會「善待自己」。善待，不是說要花很多錢犒賞自己，而是學會不逞強，理解內心的情緒，適時放鬆，讓情緒找到排解的出口。

感到疲累的時候就休息，感到焦慮的時候找人聊聊，感到迷惘的時候可以找書來讀，感到慌亂的時候就提醒自己做幾次深呼吸。

我們經常會忘了，變好是為了什麼，如果會讓自己痛苦，會讓自己抑鬱，那就失去了意義。無論是遇到多麼困難的事，身處在多麼冷漠的環境，都要給自己最溫柔的支持，安撫躁動的情緒，內心平靜才能抵抗外頭的喧囂。

讓自己越來越好，不只是在能力上，更要在心靈上強壯，要明白有些事無法做到，而且要有自信，就算一時沒做到也不會一蹶不振，我們會從失敗的過程中學習與成長，那是必須認真鑽研的功課。

《人生嘅越位》

咩嘢係人生嘅「越位」？即係做出不符合既有形象嘅事。

正所謂：「好人難做。」一個衰人，做一百件「壞事」，然後有一日做番件「好事」，啲人會覺得好感動，立馬「恩語之聲」上身，對於佢會再做好事又有期望；而一個老好人，做一百件「好事」，那怕有一日嗰件好事做得唔夠好、甚或至做番一件半件「壞事」，已經畀人罵到飛起，「呢個好人開始變壞呀」。所以呢，「做衰人」幾好做。

人沒有想像到那麼客觀，當期望值與現實有落差，人們就會有槓桿式的正面或負面觀感，而唔係客觀去睇件事本身係「已經好好」定係其實「只係比好差好咗少少」。

又，古乳有云：「男人不壞女人，女人不愛。」普遍女人唔係鐘意「壞男人」，而係唔鐘意「悶男人」，「壞男人」通常懂得挑動女生的情緒，「老好人」只懂迎合，不會拒絕，沒有作為一個雄性動物應有嘅主見及做人原則。

女人傾向感情細膩，好怕悶但又需要安全感。鐘意(其實男人都係)驚喜但唔鐘意驚嚇，「驚喜」同埋「驚嚇」嘅本質都係源自於「未知」嘛。只係所謂有啲「未知之數」係有分正面同埋負面。女人要的，係建基於有足夠安全感底下的「驚喜」。

所以，呢個世界，最好賣的，唔係化妝品、唔係iPhone、唔係Bitcoin，而係「販賣希望」。啲傳銷呀、保險呀、投資呀、賣八萬蚊一個Course的Brian Cha呀，都係販賣緊「希望」、「願景」、「藍圖」。

未來係點冇人知，而就正正因為冇人知就任你點賣喇，你解釋到咪得。聲稱可以用「極少量血液就能快速測得患者是否患有癌症」的美國矽谷科研公司Theranos和FTX創辦人「薯條哥」Sam Bankman-Fried的衰落正正反映「龐氏騙局」的歷久不衰。

又轉個彎講番足球。任你以前有幾風光都好，C朗就係接受唔到自己須要「急流勇退」嘅現實，接受唔到自己因年月老去、體力不足以支撐自己保持高峰狀態嘅事實，總係要藕斷絲連，又上節目數曼聯的不是以致成為兩方結束賓主關係的「壓死駱駝的最後一根稻草」，係要搞臭自己個名，「臨老入花叢」，玩爛自己嘅Brand Image。

C朗高峰已過已成事實，同期的美斯細佢兩年都仲踢得下，網上消息表現人哋已經諗定後路去由碧咸打骰嘅美國足球國際邁阿密搵真銀。

有時，一動不如一靜，冇建設性嘅說話，對於維持破壞自己形象嘅作為，唔講好過講、唔做好過做。當人哋唔知你乜嘢底細時，通常就會畀「the benefit of the doubt」你，唔係正數、唔係負數，而係「0分」。慎言和慎行，係人生之中一大課題。究竟係「力爭上游」定係「自暴其短」，真係閣下先知。

心理學三大巨頭兼個體心理學鼻祖阿德勒講過：「所有煩惱都是人際關係的煩惱。」

當我哋學會做人低調、更加Low Profile，就唔需要滿足咁多社會及身邊人對佢嘅期望，做好自己就可以。一開始唔好畀咁多期望人哋，咁咪唔洗有咁多煩惱。但呢啲，通常都係啲「上咗岸嘅人」，又或者係「出咗家嘅和尚」先會有嘅諗法。家底一般，仲玩緊升職上位嘅人，好似冇乜本錢講呢樣嘢。

咁既然仲玩緊呢個遊戲，我哋可以點樣明哲保身？學懂謙遜、學懂Expectation Management、學懂「Underpromise」但「Overdeliver」乃職場生存之道。

錢係賺唔盡、名係拎唔盡、數據係刷不盡，總有一日，一個地方唔再需要你嘅存在時，咁你就學識轉換跑道，喺另一個崗位上邊發光發熱。一個人過去嘅成就，唔會因為你嘅突然退出而被抹煞，留返個美好回憶畀人唔好咩？

《以探險家角度學習》

如果，我再將學嘢呢件事再簡化呢，學習嘅本質，就係「強化已知」和「了解未知」；學習，就係「山洞探險」嘅過程。

喺入呢個山洞之前，學生與導師的身份既是探險家，亦係同行者，大家同時將自己嘅既有知識暫時「動態清零」，進入「蠢材狀態」，無分高低。之後，大家就進入一個「未知」的山洞進行探險。學習知識本身，就係一個擴闊世界觀嘅過程。如喺學習一樣嘢之前，就經以以自己所累計嘅知識形成一個既定立場，睇嘢注定會有盲點。

經過山洞，我哋會遇到唔同嘅「怪物」，當遇到問題(怪物)時，我哋要睇下手上邊有甚麼工具對付佢。喺應付怪物嘅能力分野上邊，學生與導師的最大分別，就係導師身上有一啲學生暫時冇嘅思考工具，當學生見到隻怪物搞唔掂，遇到「思維困擾」、「書到用時方恨少」嘅感覺時，就係導師出手嘅時候。導師就好似「叮噹」咁，能夠適時引導學生去試下用某啲工具應付面前的怪物。之後，學生就會從過程中學多咗一種工具嘅用法。

我只係將Elon Musk的說法，用番廣東話去解釋。

到要用到嗰樣工具(Past Paper)時，我再解釋畀你聽點解要用呢樣工具(Concepts)，點樣用(Techniques)，喺甚麼其他情況可以用同樣的工具(For Future Questions)。傳統教育方式最大的弊病在於，我一嚟就一次過曬冷同你講晒「你有一百樣、一千樣工具可以用」，咁係無意思，因為冇代入感。用到嗰樣工具就教嗰樣，係最理想方法。都，好似仲差咁啲嘢。教學最緊要係有互動，換個說法，即係，有啲嘢，唔係「Zoom教學」所能取代「面授」嘅。

用到嘅嘢先係自己嘅。你教唔識人，教完之後都淨係你自己識，唔洗幾年，幾秒鐘後未落堂都畀番晒導師。所以呢，教學最應該講求嘅係知識轉換率(Knowledge Conversion Rate)，而我呢幾年嚟，其實就係一直研究緊「道」，無乜點樣真正實踐。

《向其他人學習》

詢問「其他人係點樣學嘢」呢個問題，即係問緊人哋「做事以及決策的原則和方法」，亦同時代表問緊人哋：「你見到某個問題嘅時候，個腦第一時間會浮起一啲乜嘢意念？五感會有乜嘢反應？究竟係「成堆生字喺個腦」、將意念圖像化、「嗅」到味道、「品嚐」到味道，定係直情有埋「觸覺」？」

關於呢樣嘢，我真係好想知，所以我喺到諗，呢個世界，有冇一個服務，就係俾錢一個人之後，我可以喺佢身邊睇佢點決策、點做嘢，知道晒佢一日會遇到乜嘢問題，而佢又會用乜嘢原則和方法去解決？

呢個又涉及私穩問題，搞唔掂，而如果其他人知道你監視緊佢做嘢，佢又唔會咁放心「露出本性」。

市場上都有類似嘅Gimmick嘅。舉個例，股神巴菲特慈善午餐拍賣大家應該聽過，啲人會畀幾千萬，甚至過億港紙，就係為咗同股神食一餐午餐，為嘅，就係股神的「金石良言」。另外，坊間亦有一啲「一日CEO」活動，畀參加者感覺CEO一天的工作係如何。都，好似仲差咁啲嘢。

另一種做法，就係傳統教科書式的畫圖，畫Mind Map。畫Mind Map都仲有一個問題，就係幅圖唔識郁嘅。我畀晒成幅圖你睇，你未必知由邊到開始畫起。左邊開始？右邊開始？中間開始？上邊開始畫？定還是係，喺下邊開始畫？都，好似仲差咁啲嘢。

再貼近少少做法，而家，都有唔少Youtuber做嘅教學影片，係由零開始畫一個概念畀大家知道點解一個題目，但，都好似仲係差少少嘢，好似都仲係一啲跳Step，唔能夠照顧所有用家的需要。都，好似仲差咁啲嘢。

《究竟叻人係點樣學嘢呢？》

道理何其多，綜合而言，來來去去都係

1) 重覆

2) 精準刻意學習

3) 從朋友身上尋求意見

4) 以Elon Musk的第一原則(First Principle)理解一件事的根本本質

5) 以遊戲方式理解學習等等

「道」即係「做事原則」(Know-why)，而「術」即係「做事方法」(Know-how)。以上所講的東西，屬於「道」的圍疇。

古語有云：「上人用道，中人用術，下人用力。有道無術，術尚可求也；有術無道，止於術。道為術之靈，術為道之體；以道御術，以術載道。」

意思即係，「上人」做每一件事時都有自己嘅「做事原則」，唔係為做而做，「中人」係叻在自己的範疇裡邊，「下人」只有一股蠻力，做事無邏輯可言，做錯多過做啱，亦不能從錯誤中學習。

先學懂做事原則，之後再學做事方法都未遲。有道無術，有「通才的思維」，尚可慢慢發展成為「專才」繼而成為「全才」，有術無道，止於一個「專才」，去到一個自己唔熟悉的範疇裡邊，就好似一個白痴咁樣，貽笑大方。坊間的所謂專家在自己不熟悉的範疇獻醜例子多不勝數。

以上嘅說話，用番五歲細路仔都明白嘅邏輯去講，即係話：「做乜唔緊要，最緊要知道自己做乜」。

做人呢，又未必真係下下都係要去到，唔識一樣嘢就唔可以搭嘴嘅，人家係呢件事上係專家但你係新手，咁你咪畀人哋「演下嘢」，表現下，反之亦然。至於你吸唔吸收到人哋獨門功夫嘅精髓，其實都好睇你問問題嘅功夫。

識問問題嘅，聽君一夕話，勝讀十年書；唔識問問題嘅，人哋聽你問多兩問都唔想應你機，又或者敷衍下你就算。做人咩都識少少係最理想，只係唔好「扮代表」。