「係你打緊牌，唔係牌打緊你；手牌爛，係手牌爛，你嘅責任只係去見一章打一章。」換句話說，其實無論手牌係靚定係爛，心態上都要抽離；唔好將自己當咗係手牌。
呢點好緊要：打牌會打到發脾氣嘅人，又或者會打到好亢奮嘅，都係畀唔係打緊牌，而係將自己當咗做手牌。
又可能有人會話：「咁抽離，不如唔好打。」
視乎你追求啲乜；後生嘅時候，放學去同學屋企開枱，志在埋吓堆。佢哋有啲都幾高章，扣牌扣得好準；就算食唔到糊，都唔好出沖。從佢哋身上，我學到好多打牌嘅巧妙。例如，雖然你揸住嘅一手爛牌，但其實人哋食糊嘅牌，偏偏就係你手上。只要你唔出沖，人哋副牌再靚結果都係摸和。副牌靚又點？食得出個副最靚。
所以，引申出我打牌悟到第二個人生哲學：「運滯嘅時候，有食唔食罪大惡極。」當然，有條件做大牌，搏一鋪雙辣，好過食十六鋪三番。但係手風唔順嘅時候，我嘅建議就係有糊就食。食多幾鋪，個勢就自自然返來，到時手上多啲籌碼，再揀擇都未遲。
一手爛牌，其實好小事。成晚都爛牌，或者會令人躁啲。但要記住，你除咗面前副牌，仲有三隻雀腳；大家可以同枱打牌，都算一場緣份。如果人家係高章嘅，咪享受吓棋逢敵手嘅機會。
心態上，永遠都要記住：贏係運氣，但唔輸大牌，就係技術。偏偏好多人嘅心態，剛好相反，總係覺得自己贏係因為技術好，輸就賴運氣；通常呢種人都唔會有進步，長遠來講亦唔會打得好。
當我遇到弱少少嘅對手，又或者對家打得唔好，又或者運滯，又或者畀你食住，通常我都會畀啲 handicap 自己，例如唔上、唔碰、打出都唔食之類。但呢啲 handicap ，唔係「讓」對手，更唔係鬆章，因為呢啲都唔尊重對手嘅表現，而且最終我食出嘅話，副牌都會大啲。另外就係，無論如何都唔好鬆章，唔好懶好人咁，因為一枱麻雀你偏幫邊個都唔應該，更唔好打開口牌。
牌品好嘅意思，唔單止係唔好發老脾，更加係尊重遊戲。
記得 The Biggest Bluff 入面都有講，打啤有個境界，就係唔當對手唔係敵人，而係大家好似夾band 、 jam歌；唔同嘅腳，jam 出來嘅感覺同效果都唔一樣。
從呢個角度去享受打牌，輸贏嘅意義唔同咗。但我絕對唔會話：「唔志在輸贏。」因為咁樣就真唔尊重個比賽，無體育精神，真係不如唔好打。
沒有留言:
發佈留言