《三風水》

風水就係我哋可以控制嘅客觀環境因素，尤其係一啲微觀嘅因素。

具體嘅生活同工作環境，一定影響到自己嘅生產力。如果一個人有呢方面嘅基本意識，結果生活同工作嘅習慣會有好大嘅分別。好多講「如何改變習慣」嘅書都教，建立習慣嘅第一步，唔係改變自己嘅心態，而係改變自己嘅客觀環境因素。

我自己近年嘅體會係，盡量簡約就一定係最有效、最舒適嘅生活同工作環境。所以我呢幾年盡量斷捨離不必要嘅身外物；慳錢都係其次，更重要係可以畀自己更專心一致。可能我係一個好易分心嘅人，所以就更加唔可以有多餘嘅物件。

衫，唔同季節，唔同場合，有幾件替換就夠；最好唔需要諗太多。書，要睇嘅時候先去搵，但有時都會無端端買咗唔睇，反而令自己覺得好似有啲負累。其他奢侈品，就更加係令自己有心理壓力，驚整壞整唔見。

風水，其實好簡單，越少身外之物，環境就越容易控制。