《停不了的買》

 

呢套紀錄片《要買趁手：消費局中局》編排方式有趣，透過人工智能「莎夏」引領觀眾如何成為出色嘅零售品牌／公司，拆穿各類消費品公司搵大錢嘅五個方法：sell more, waste more, lie more, hide more, control more，希望透過逆向表達手法令觀眾明白生產商如何仆街、避免墮入過份購物嘅陷阱。

以前睇過唔少講過份消費同相關議題嘅紀錄片，《要買趁手》冇咩驚天動地嘅內容，有啲倡議甚至陳腔濫調（例如過份生產令第三世界充斥垃圾）。不過訪問嘅嘉賓有 Adiddas嘅前高層、Amazon 設計網頁嘅前員工，帶嚟啲業內資訊，但呢班人做盡佢哋口中嘅壞事，賺夠搵夠就嚟懺悔，有夠誠意囉。

紀錄片上影之日，正正係美國消費大節 Black Friday開始之前（咁啱仲係 Amazon Black Friday之前個日），對於警醒世人合理消費，可能有些少作用。對我呢啲零物慾嘅人嚟講，本身少消費，網頁設計再靚再方便、啲嘢再平都好，啲嘢冇用就唔會買，所以紀錄片對我無咩額外影響。我對於要電子產品生產商處理埋消費者拋棄嘅電子垃圾、追求環保、減少浪費，即係叫馬會解決沉迷賭搏，肯定陽奉陰違。

唔係唔好買，不過買之前諗清楚、考慮兩三日先落單。