任何買過股票嘅人，肯定遇過以下心理狀況：
— 心緒不寧。成日睇住股價嘅升跌，心思思計住賺幾多同蝕幾多，難以集中做其他正經事。
— 後悔不已，「有早知，冇乞兒」。股價升，後悔冇再買大注啲；賣咗股票後股價再升，又揼春太早賣。股市急跌損手嗰陣，「早知有賺嗰陣賣咗佢」，甚至唔覺意「短炒變長持」，懷疑當初投資決策係咪正確，終日悶悶不樂。
— 又驚又怕又擔心。市場急跌嗰陣，感到恐慌，擔心損手爛腳回唔到本。又會因股市動盪而感到迷茫同無助，唔知保持原定計劃定係止蝕離場。某啲人仲擔心全球經濟出現問題，「危機」、「衰退」、「爆煲」終日困擾自己，活喺擔憂中。
— 心情起伏不定，隨股價升跌而變化。升市、賺大錢嘅交易日，做咩都寧捨順風順水；跌市、輸錢嘅日子，硬係覺得一身唔聚財。如果股市由升轉跌，單日轉向，心情更尤如坐過山車，由高峰衝向谷低。
— 心雄，貪勝不知輸。買咗股票短時間內有賺，以為自己眼光好、投資技術佳，貿然加注，十居其九加完注冇耐就輸凸。
如果你喺香港或亞洲時區買美股，更大鑊。你臨瞓前美國啱啱開市，正常人都會擔心自己瞓著嗰陣美股出現股災、或自己持有嘅股票價格出現大幅變動，除非唔瞓覺，要到自己第二朝瞓醒先知收市結果。有啲人會因此長期處於緊張狀態，不論升定跌，美國股市表現，多少都會影響心情。
沒有留言:
發佈留言