《訓練投資股市嘅大心臟2 》

問過偉大嘅ChatGPT，如何喺波動嘅股市，保持冷靜理性，培養出良好同穩定嘅心理質素。佢畀嘅答案有啲「何不食肉糜」 — 「啊，你驚啊，咁保持冷靜，唔好過份反應，咁就唔會驚」，嘥氣。同英國超市啲賊偷完嘢拔足狂跑，門口食蕉叫佢「喂唔好跑」一樣咁有用。

而家我根據自身多年投資失敗嘅經驗，同大家講如何訓練投資股市嘅大心臟。

最簡單，唔使訓練，繼續驚、繼續讓心情隨股市起伏，接受以上嘅心理狀況。投資大師彼德．連治(Peter Lynch)表示，「任何時候，任何地方，都會有人因為種種理由擔心股市下跌，恐嚇經濟衰退或股災風險。」呢樣係無可避免，就算唔買股票你都可能一樣驚。我覺得唔驚股市下跌嘅話你會失去警覺性，好容易出錯。調整心態，好好擁抱「擔心」、「恐懼」，接受無論自己做咩都好，呢堆負面心理狀況都唔會消失。再去，學習點樣透過「無視」、「改變」、「迴避」，透過適當嘅策略，令佢哋唔影響你之餘，甚至令你心情轉好。