香港，有種幻覺比「聽日會準時返工」更普及，叫「中產幻覺」。
你可能經常都會聽到身邊嘅朋友講：「我哋呢班中產，人工明明唔低，點解生活仲係咁忙咁攰，好似做極都唔夠咁？」
但實情係，社會越來越多中產，定還是越多來越多人「誤判」自己係中產？
如果你去中環求其搵個着住 Lululemon 或者bespoke suit嘅人，問佢：「你覺得自己算唔算中產？」佢多數會一面謙虛但內心澎湃咁點頭。但如果你問佢：「咁你生活過得輕唔輕鬆？」佢會用一種飽經風霜嘅眼神望住你，話你知佢有幾攰。
呢種「又自豪又覺攰」嘅心理狀況，係香港社會最sad but true嘅現象。
以前嘅中產，係社會三角形尖端以下，但仍然係靠上面果部份人；而家嘅「中產」，係靠 Inflation（通脹）堆砌出嚟嘅量產型，同電動車中嘅比亞迪差唔多。比例上明顯多咗好多。
正如，以前大學生係天之驕子，而家大學生多到好似便利店咁總有一間喺左近。但我哋呢代人對個學位仍然會有種莫名其妙嘅優越感，總會覺得自己讀過幾年書，出黎做嘢個 Title 叫 VP（副總裁），生活就理應要比人高一格，甚至幾格。但佢哋唔知道呢個年代，title inflation 到連清潔姐姐都叫環境部主管，看更叫前線公關主任…
喺社交媒體睇到人哋去北海道滑雪，你心諗：「冇理由佢得，我唔得架？我係 VP 喎！」於是你明明戶口嘅錢都唔係好夠洗，都要分期找數去一轉二世古。
沒有留言:
發佈留言