《人嘅嘢，自我感覺良好就夠2 》

香港嘅「中產」定義其實好虛無。有月入二三十萬嘅中產，又有月入十萬嘅中產，有人月入3萬都覺得自己係中產。究竟應該點定義？其實「中產」應該係講一種生活態度，社會既地位、status，唔係單單講你有幾錢人工咁簡單。當然每個人嘅睇法都唔同，然而大家都自我感覺良好。

月入五位數嘅「輕中產」唔買樓、唔生仔、唔使養長老。佢哋份糧啱啱夠佢哋每星期食一餐 Fine Dining，每日一兩杯 Starbucks，一年去三次日本。呢種叫「生存以上，理想未滿」嘅自high。

月入六位數嘅「窮忙中產」，買咗樓要供，有仔女要養，仲要養埋四大長老加個工人姐姐。有工人姐姐又要住大啲，小朋友要去名校、學琴棋書畫、讀國際學校。佢哋嘅生活質素可能仲差過月入幾萬嗰班，一闊三大，收入只係過路錢。

呢班「偽中產」有個共通點，佢地自我感覺良好嘅同時，其實大家都係出賣時間換金錢嘅高級打工仔。但中產最鍾意嘅，係互相比較。儘管大家嘅視野，永遠都去唔到三角形頂端嗰層，但偏偏要喺「消費層面」鬥個你死我活。社交媒體嘅開心share當然係主要元兇之一。

而呢份中產嘅焦慮，最後通常會轉嫁落下一代。當你發現自己努力咗十幾年，個 status 都係冇改善，依然係個要睇老細面色嘅奴隸，你就會開始自我誤判：「一定係我當年輸咗起跑線！」於是，你自己追唔到嘅嘢，就要仔女幫你追。

人哋個仔讀喇沙，你個仔就要讀男拔。你將自己對社會嘅不滿同無力感，包裝成「望子成龍」嘅愛。最後，成條中環街頭都係一堆「虎爸虎媽」，大家都喺度追求一啲唔屬於自己 Level 嘅虛榮，美其名曰「為仔女好」。

講到呢度，你可能會覺得偽中產好悲哀。但「中產」呢份幻覺，其實係維持社會穩定嘅最大功臣。