《做返一個人》

2019 年 Zelenskiy 就任烏克蘭總統嘅時候，講過以上嘅說話；同一個場合，佢亦都引用 Ronald Reagan 嘅名句：Government is not the solution to our problems; government is the problem.

作為個人主義者，我嘅信仰裡面，任何人嘅存在，都係卑微嘅個體；所以我亦非常抗拒偶像崇拜。但見到真正嘅勇氣、智慧、仁愛，都會被感動嘅。

英雄同偶像，最大嘅分別，就係偶像只用來畀人膜拜，但領袖會 inspire 其他人去有勇氣、智慧、仁愛等美德。

個人主義者唔需要偶像，更唔想見到霸主嘅欺凌，但係見到真正嘅領袖，會由衷讚賞，會去諗吓點樣令自己變成一個更好嘅人。

呢個世界始終都需要英雄；但通常英雄都意味呢個世界已經墜落。「大道廢，有仁義。」呢句話，你想點解就點解。

Zelensky 無講乜鳩嘢命運共同體；但我會覺得，佢用自己嘅生命，去話畀全世界知，乜嘢係命運共同體。

神奇國度，又話乜嘢反霸權主義，乜嘢支持國土完整。Give me a break；其實神奇國度嘅言行，比自私更自私，因為自私之外，仲加多一種虛善。

之前我話，唔係反乜反物，做返一個人，就已經世界和平；有好多人唔同意，認為人就係自私，人性就一定係黑暗。

諗深一層，可能因為佢哋真係畀黑暗淹沒咗太耐，又或者借用柏楊所描述嘅詞語：「醬缸文化。」

記住，英雄，會令我哋每個人都變成更好嘅人；魔鬼亦都會令我們不知不覺間，成為自己最憎恨嘅個種人。

所以，要清楚知道自己嘅喜惡，唔好做違心嘅事，唔好令自己睇唔起自己，唔需要同全世界證明啲乜嘢，呢啲就係「做返一個人」嘅意思。