《假嘅真不了》

而家呢個世界，無乜嘢係唔假。

假仁假義、假眼、假口、假鼻、假髮、假眼睫毛、假胸、假話、假笑、假數據、假相⋯⋯要數假嘅嘢可以好多，但真嘅嘢呢？

所以我成日都話唔好信 FB / IG 啲人 post 出嚟嘅嘢就當係佢哋生活嘅全部，嗰啲都係個人 Marketing，俾你知我今日有食咗好嘢，睇咗場歌劇、有隻好 cute 嘅狗、有架開篷跑車、有好 Chill 嘅生活（本人自我描述自己社交平台），其實都不過係生活嘅冰山一角，或者只係一場形象工程，真正嘅生活係返工、放工、做打雜、屋都係同人夾份租、每月愁又要交租但油價水電乜都升。

講咁多都係想講呢個世界真嘅嘢越嚟越少，假嘅嘢多到不勝枚舉。紀錄片之所以好睇，最重要一點就係因為係「真」！唔係創作力量同幻想，而係真真實實日常生活中發生過嘅事、新聞報導過嘅事、有人親身經歷過嘅事，令觀眾好易代入「如果係我又會點？」，亦同時令觀眾詫異，原來唔係戲如人生，而係有咁多人嘅人生真係如做戲一樣咁曲折離奇、咁癲咁喪、咁令人難以置信。