《當富士山冇咗個雪頂奶蓋》

我鍾意富士山係因為佢係富士山？定還是我只係鍾意富士山個奶蓋？冇咗個奶蓋，佢就唔再係富士山？

好多人鍾意某位明星，係因為佢嘅外表、佢嘅身材、佢哋演技歌藝，或者係某啲我哋自我投射嘅形象，當佢老咗肥咗身材走樣咗或者醜咗，又或者真面目原形畢露、啲技能生鏽跌watt嘅時候，我哋就失望難過，唔再鍾意佢，咁同富士山冇咗個奶蓋，又係咪同一個邏輯呢？

你話自己真心愛李嘉誠或者馬雲，唔係為咗佢啲錢，所以佢點樣你唔介意，但如果李嘉誠同馬雲冇晒錢，只係一個塊面係正立方體嘅民工，或者中年地中海阿叔，你係咪唔會介意，一樣愛佢？一樣全盤接受包容佢哋嘅缺點？

生而為人，好難唔會因為某啲條件原因而愛上一啲嘢，所以講白啲，我哋愛嘅其實只係某啲特質，同條件，而唔係果樣嘢本身；當冇咗嗰啲特質同條件，所有嘅嘢，就瞬間消失，頓時人間清醒……

世上只有無緣無故嘅恨，但唔會真係有無緣無故嘅愛，更加唔可能有無條件嘅愛。所謂無條件，只係自己唔發現，或者唔願意承認而已。唔好同我講父母嘅愛係無條件，我諗好多親身經歷過父母嘅勢利自私以至計算嘅原生家庭受害者，都可以即刻企出嚟用一萬個親身體驗嚟反駁你。

對我嚟講，世上恐怕只有宗教，先至會比較接近所謂無條件嘅愛。又或者我哋要嚟呢個世界學習做人，就係通過體驗各種有條件嘅愛，明白何謂無條件嘅愛。