《所有關於碳水化合物，你要知道嘅嘢3 》

基本上所有食落肚，消化到嘅碳水，最終都會變成葡萄糖（碳水嘅最基本單位，等同蛋白質嘅氨基酸）。呢啲葡萄糖第一時間會入咗血液裏面，但血液承載糖嘅能力有限，一般來說，只有5-10克。多出嚟嘅糖，就會交俾胰島素處理。

首先，胰島素會將多出嚟嘅糖，送去全身細胞，好似「霞姨派飯」咁，逐間逐戶敲門送外賣。

派剩嘅葡萄糖，有三個結局：

1. 送去肝臟（變咗肝糖）

2. 送去肌肉（變咗肌糖）

3. 送去脂肪細胞（理論上可以無上限儲存）

好在胰島素係冇選擇困難症，首先一定係肝臟先，因為肝糖負責供應器官運作，對身體好重要。其次，就係肌肉。如果肝臟係一個迷你倉，肌肉就係一個大貨倉，而且係可以擴建嘅大貨倉。肝臟儲糖量大約100g，每個人都差唔多，後天好難改變。肌肉儲糖量大約200-500g，你會見到範圍好大，因為我哋可以透過增肌改變。如果最後都裝唔晒，就會打包變咗脂肪儲存喺身體各個地方。