肌糖比較自私，儲存咗喺手臂，只供手臂使用，而大腿嘅糖只會比大腿用。簡單講，當你操腳操到腳軟時，你隻手依然會充滿力量，唔會借啲力（糖）比隻腳，更甚者，就算你血糖低暈咗，肌糖都唔會幫手，由你死。唔似血糖同肝糖，佢哋比較通用，邊度唔夠糖就會去幫手。
所以，你要清空肌糖呢個大貨倉，騰個空間俾你之後食嘅澱粉質，唯一方法就係運動（郁動肌肉），高強度運動會比較有效率，例如健身同HIIT。所以點解健身唔會直接消耗脂肪，但都可以幫助減脂。
跳返去講胰島素，胰島素係人體嘅合成激素，無論增肌定增脂，都需要佢。所以佢係「中性」的，唔係邪惡（另一個好出名嘅分解激素叫皮質醇，同樣中性，冇皮質醇你分解唔到脂肪）。
適量嘅胰島素好重要，由上文你會知道，胰島素就好似一個開關，血糖高就開，將葡萄糖派去唔同地方。但不幸嘅係，胰島素係一個好唔準確嘅機關，永遠都會分泌過量。換句話講，你嘅血糖水平有幾高，之後就會有幾低，造成血糖波動。
因為血糖高會有生命危險，我哋身體為咗保護我哋，寧願分泌過多胰島素，壓低血糖，但血糖低會刺激食慾。
另一方面，當你進食過量澱粉質，血糖長期處於高水平，代表胰島素長期要開工，當「霞姨」每分鐘都敲門問你（細胞）食唔食飯嘅時候，就好似狼來了嘅故事咁，你唔會再理佢。呢個就係胰島素阻抗。
多囊（PCOS）、糖尿病、肥胖就係因為胰島素阻抗而導致減肥困難。因為當細胞拒絕接收胰島素送來嘅葡萄糖，呢啲葡萄糖最後會變咗脂肪儲存（前提係肝臟同肌肉嘅糖都滿晒），亦都解釋咗點解健身可以改善胰島素阻抗，因為清空咗肌肉入面嘅糖。
沒有留言:
發佈留言