《基本功》

有位鍾意踢波嘅中學生。佢喺球隊選拔衰咗，入唔到圍。

我：啲人勁唔勁？

佢：勁。

我：出咗全力未？

佢：出咗。

我：練好啲基本功，下年再選過。

佢話有四、五十人參選，名額廿個左右。我話我以前我都係區隊，嗰年過百人選拔。我入選，拎埋全港冠軍。

我繼續話：

「生命中，所有好嘢都會有好多人爭。同踢波一樣，你出盡全力去爭，都未必爭到。所有嘅頂級專業 —— 醫生、律師、建築師之類 —— 喺人生路上，會煩少好多嘢。例如我每日都驚我公司會執笠。我班醫生朋友就每日愁啲錢點洗。呢啲好嘢，自然會有好多人去爭。得罪講句，踢波已經係一條明知會辛苦嘅路，但都有咁多人去爭。你諗下，爭醫生律師嘅人，係一班點嘅人？

不過，好消息係，以我嘅目測，十個中學生，九個都唔識咁諗。大約得唔夠一成日會出盡力去爭呢啲嘢。你嘅對手其實無想象中咁多。你夠聰明，只要出盡力去讀，入港大中大係無問題。但你繼續 hea 讀，就英文都唔洗旨意合格。想做咩人，你自己揀。」

呢段有感而發，係我自問係我其中一段最有智慧嘅發言。

然後，佢露出一幅「收皮啦你，關你叉事咩」嘅表情。兩星期後，佢就無再嚟上堂。

我諗佢一定係去咗練基本功！