《中式邏輯契弟論》

如果揸的士搵得多過啲議員同局長、副局長、政助，又會唔會唔到你呢班人做呢？

再講，議員、官員收入夠高喇啩，咪又係西口西面？根本就係受保護嘅既得利益者同一班小農思想嘅契弟論信徒。

我都有問過啲的士佬，點解唔轉揸 Uber ，佢哋話：「犯法嘅嘢我唔做。」但佢哋又成日揀客、拒載、坐地價。

「犯法喎。」我問。

「自由市場吖嘛。」佢又話。

「Uber 都係自由市場嗟。」我話。

「犯法嘛。」其實講到呢度，你已經知道，呢班人你個佢講道理，佢就同你用中式邏輯 去兜。

乜嘢係中式邏輯呢？例如佢哋會成日話要守規矩，但佢哋心目中嘅規矩，就係個一刻對佢哋有利嘅任何嘢。我發覺好多有呢種中式邏輯嘅人，開口埋口都會講啲法律嘅名詞，但係講到一塌糊塗。

歸根究底，中式邏輯對概念無會有具體嘅定義，未進入後現代之前，呢種後現代講求主體感受嘅境界，就已經深植於呢種中式邏輯當中。

冇具體客觀嘅定義，就唔可能有任何原則可言；例如講自由市場同法律，佢哋就已經好明顯對呢兩個概念既無清晰嘅定義，亦無任何原則性嘅思維。

佢哋覺得，權宜係等於靈活。

其實佢哋只係膚淺同虛偽；兩件事只係同一個問題見諸於對事同對人嘅態度。

佢哋講到自己幾咁有文化，外面嘅世界係幾咁野蠻；但係一遇到外面嘅世界，又忽然覺得好自卑。然後就話；「我哋中國人幾千年文化⋯⋯」

契弟論其實都係由膚淺、虛偽加上自卑混合而成嘅一種人際關係價值。簡單講，佢哋相信，如果自己唔想做其他人嘅契弟，就要其他人做自己嘅契弟。

各位，最後都要循例講一次，如果你覺得呢種中式邏輯、契弟論、無原則、無厘頭好難頂，第一件事就係唔好令自己變成呢種人。